wp

وفاء عشري

جنوبية تبحث عن الحرية لكل بنات جنسها فى عفن موروثات مجتمعها الجنوبى

شاركت فى تأسيس مبادرة “جنوبية حرة” التى تهدف إلى رفع وعي الفتيات الجنوبيات والحد من العنف ضدهن

ترشحت على المقعد الفردي بالدائرة الأولى بأسوان فى انتخابات برلمان 2015.

كل سنة وستات مصر بوجه عام وستات الصعيد بوجه خاص عايشين بعزة وكرامة، أنا مكنتش ناوية اتكلم فى الموضوع دا لأنه غير متوافق مع قناعاتى،  لأنى باعتقد أن الشرف هو ضمير المجتمع فى الحكم بكل شفافية ووضوح وعدل على المشكلات الاَزلية المريض بها المجتمع، لكن بعد الهرى  اللي حصل بخصوص الموضوع دا بعد تصريحات أحد المدونين عن المشاكل التى تعيشها المرأة في الصعيد، استفزنى جدًا رد فعل الناس  اللي هاجوا وماجوا بعدها على شرف مصر واللي ربطوه بستات مصر.

يا جماعه إحنا هنا قصاد تراجع أو تردي أو تخلف فكري تقدروا تسموه زى ما أنتوا عايزين، ودا على الرغم من التوسع في اَليات التعليم ووجود جامعة تعليمية فى كل محافظة  (ياحِزنى)، ويبقى السؤال اللي حتمًا لازم نسأله لنفسنا، هو المجتمع المصرى بيقَدر شرفه ازاى؟

وليه طول الوقت المجتمع شايف أن الستات هي اللي لازم تصون شرف الوطن؟

وهل دا معناه أنه مفيش حوادث فردية من السيدات في الصعيد بتحصل فى الواقع؟ ولا إحنا بنحب نحط رؤوسنا فى الرمال عشان منشوفش حقيقة الأمور.

طيب ولو نفس الحوادث دي حصلت من الجنس الاَخر اللي هما نص المجتمع “الخشن”، المجتمع بيشيل الطين على دماغه ولا بيبرر له؟

أزمة المجتمع الحقيقى هو  أنه بيقيس الأخلاق والاَداب العامة بمكيالين، وأن حكمه على الأفراد، غير متكافئ خاصة فى القضايا التى تتناول الجنس، لأنه بيطبق نظامه الخاص به،  بدون اعتبار للقيم الأخلاقية.

لو عايزين تتكلموا عن شرف مصر المتهان، تقدروا تحكوا عن كمية الرشاوي المتداولة فى مؤسسات الدولة، إذا كنت عايز تاخد حق لك، ولا الواسطة والنفاق عشان تقدر تخلص شغلك بدون معوقات، ولا قلة الاحترام لإشارات المرور، ولا تلويثنا لمياه النيل اللى بنشرب منه، ولا..ولا…ولا….

هانحكى عن كتير من السلبيات الموجودة  فى المجتمع اللى مضيعة شرف مصر فى ستين داهية.

إحنا يا حضرات فى لحظة إنكار للواقع مش هيؤدى إلى وجود حلول حقيقية لمشكلات وتحديات كتيرة اقتصادية واجتماعية فى حياتنا بتواجهها المرأة بحكم أنها أم، وزوجة، وابنة، وأخت، ومن أهمها التنمية الحقيقة فى الصعيد واللي محصلش منها أي خطوة حتى الاَن، حتى على مستوى  قيادات المحافظين الحاليين.

كمان القوانين الخاصة بالمرأة وسرعة إجراءات التقاضي وقوة تنفيذها فى قضايا الإرث أو الطلاق أو النفقة.

يا ستات مصر.. يا ستات الصعيد كل سنة وأنتن بخير وعزة وكرامة .. وشوفوا حد تانى تقيسوا عليه شرف مصر.