كلمات: سامح عشاوي

جوا قلبه كان بيحلم يبقى آدم

زعلوا لما لقوها حوا

كان بيحلم يبقى عزوة .. يبقى سنده بكل قوة

وأما كبرت

فرقوهم فى العلام فرقوهم فى البيوت

إيه هتاخدى من العلام

وأنتِ آخرك للبيوت

قومى يلا واسقي أخوكي أصله واكل أكلة حلوة

لجل يقوى ع البارود

ولو يضيق الحال شوية

راح يفكر فــــ البنية

جوزوها للى يدفع .. حتى لو كانت صبية

خدت بعضي وقمت رايح ع الصعيد

قالوا مرحب باللي جاي

صبوا قهوة وصبوا شاي

قلت ليا سؤال وحيد

مين بيورث فى الصعيد ؟؟

قالوا يابنى اللي يورث .. الرجــــــال

قلت ما الشرع اللي قال

ليها ورث نص أخوها ..

قالوا لا مابنديهاش

ندى خيرنا لغيرنا ينعم بالأراضي وبالفلوس

تبقى عيبة فـــــ حقنا

يبقى عار على النفوس

ليا عليكم 100 عتب

مين اللي قال إن الرجولة بالشنب

الرجولة عهد بينى وبين إرادتى

إنى أكون عندى أدب

ومن الأدب إني اعترف إن بيني وبينها عهد

نبنى دايمًا مش نهد

نبقى للأعداء سدود

هي سد .. وهو سد

نحمي أرض ونحمي عرض

مش نشوفها بتغتصب ونقول أكيد هى السبب

مين يوافق مرة تسمع

كلمة جارحة و ع العيان

مين هيرضى يوم يشوف

هتك عرض وفـــ الميدان

ادعوا للى مات ما بيننا

ادعوا للنخوة فـــ ضميرنا

وادعوا ع الخوف اللى عايش

وادعوا للمرحوم (أمان)

حواءُ ياذات الحــياء

يانبض المحبة والوفـاء

حواءُ يافخر العروبة

يا رمز البطولة والفداء

أنتِ المكرمةِ التى جعلت لها

سورةٌ باسمِ النسـاء

يا جنة الأرضي التي

فاحت بريحان السماء

حواء أعلم أنك تتألمين

من كل ألوان الجفاء

فتقبلى أعذارنا

عن كل معنى للعناء

ولتعلمي أن الليالى المظلمة

حتمًا سيأتيها الضياء