يعنى ايه نسوية ؟! ..أنتِ ليه نسوية ؟! .. يا بنتي النسوية دي شيء عنصري أصلاً لأن فيها تمييز ضد الذكور .. سؤال اتوجه ليا كتير من بعض أصدقائي سواء من الرجال أو حتى النساء ولا يخلو من نبرة هجومية مصحوبة ببعض التهكم .
حبيت بحكم مهنتي أنى أجاوبهم عليه بس مش من منطلق دفاعي حقوقى، إطلاقاً بالعكس من موقع هجومي على الإقصاء والعنف والتهميش اللي الست المصرية عايشة ومعيشة نفسها فيه بكل جوانحها الحقيقة؛ لأنه مفيش شك من وجهة نظر الكثيرين وأنا منهم إنه للأسف ممكن جداً أن تتجسد الذكورية فى امرأة مش بس فى الرجل.

وفيه نماذج لستات كتير بيتمتعوا بعقلية ذكورية على الرغم من أنهن الأكثر تعرضًا للظلم والأحكام المسبقة من المجتمع، إلا أنهن أيضاً الأكثر في إصدار الأحكام المجحفة على غيرهن من الستات.
فى الحقيقة عاوزة أقول أن كتير من الناس ومنهم ستات للأسف بيشوفوا أن النسوية فكرة عنصرية لأنها قايمة على حساب فكرة الانحياز للمرأة وحدها دون الرجل، وطبعًا أحب أقول لهم أبسلوتلى – أنتوا فاهمين النسوية غلط على فكرة – النسوية يا أصدقائى ببساطة هى حركة هدفها مجتمع تسود فيه مبادئ المساواة الاجتماعية بين الرجل والمرأة، وبالمناسبة النسوية مش حركة كارهة للرجالة ومش هدفها إقصائهم وتهميشهم على الإطلاق، بل على العكس تمامًا من الممكن جدًا أن يكون الرجل حليف أساسى لقضية المساواة بين الجنسين.
طيب .. ليه بقى أنا نسوية؟
· أنا نسوية لإنى من طفولتي وأنا باعيش التمييز والعنف والتهميش ضد النساء فى كل تفاصيل الحياة اليومية فى بلدى .
· أنا نسوية لأنى من وقت ما كنت فى المدرسة وأنا باتعلم أن “ماما ” فى المطبخ، و”بابا ” يقرأ الجورنال، وأن ” أمل ” تساعد ماما فى المطبخ و”عمر” يساعد بابا فى الحقل .
· نسوية لأن لسه تراثنا الشعبى بيكرس أمثال شعبية من عينة ” لما قالوا ده ولد اتشد ضهرى واتسند “، “لما قالوا دى بنية اتهدت الحيطة عليا ” وأمثال من عينة ” يا مخلفة البنات يا شايلة الهم للممات”
· نسوية لأنى عايشة فى مجتمع بيردد بكل فخر أن البنت اللى ما اتجوزتش تبقى “عانس” ، والولد اللى فى نفس عمرها وما اتجوزش يبقى “عازب ” أما المطلقة أو الأرملة لازم تكون “خطافة رجالة “.
· نسوية لأن حوالى 99 % من بنات البلد ىبيتعرضوا للتحرش الجنسى بكل أشكاله فى الشارع بداية من التحرش اللفظى وحتى الاعتداء عليهن باَلات حادة فى أماكن حساسة من جسدهن، وفى الوقت اللى من حق البنت تمشى فى الشارع بأمان لو بس حبت تعترض على اللى بيحصل لها يبقى لازم تسمع اهاناتها من الناس بنفسها ويتقال لها كلام من عينة “أصلك لو محترمة مش هيحصل لك كده”.
· نسوية لأن قانون الأحوال الشخصية الخاص والموضوع من سنة 1929 ببلدى لا ينصف النساء على الإطلاق .
· نسوية لأن المادة 60 من قانون العقوبات المصرى بتعطى للزوج حق ضرب زوجته طالما كان ذلك لا يخالف الشريعة الإسلامية.
· نسوية لأن المادة 17 من قانون العقوبات المصرى تبيح للقاضى حق استخدام الرأفة والنزول بالعقوبة درجتين فى قضايا الاغتصاب .
· نسوية لأن أكتر من 96 % من بنات بلدى بيتعرضوا لتشويه أعضائهم التناسلية تحت مسمى”ختان الإناث” فى مجتمع لسه بيشوف أن البنت اللى ما اتخنتش أكيد مش محترمة .
· نسوية لأنى عايشة فى مجتمع لسه بيشوف أن البنت الطموحة اللى عاوزة تثبت نفسها فى شغلها أو عاوزة تشارك فى البرلمان بنت مسترجلة وفايتها قطر الجواز .
· نسوية لأن الإعلانات فى التليفزيون من عينة “استرجل واشرب بيريل ” كلها إهانة وتمييز وتكريس للعنف ضد النساء.

· نسوية لأنه بالرغم من مرور أكتر من 100 سنة على الحركة النسوية المصرية، وبالرغم من عظمة نضال رائداتنا النسويات لايزال التمييز مستمراً والتغيير بطيئاً ..وأخيراً أنا نسوية وافتخر.